ឃាត់ខ្លួនជនជាតិចិន០១ម្នាក់ បើករថយន្ត ០១គ្រឿង សង្ស័យប្រុងដឹកសាកសពយកទៅបោះចោលក្នុងទឹក

 

ខេត្ដឧត្ដមានជ័យ ៖ ជនជាតិចិន០១ម្នាក់ ត្រូវបានប្រជាពលរដ្ឋចាប់ឃាត់ខ្លួនប្រគល់ជូនសមត្ថកិច្ចនគរបាលខេត្តឧត្តរមានជ័យ ខណៈពួកគាត់ប្រទះឃើញរថយន្ដជនសង្ស័យជាប់ផុង ក៏នាំគ្នាទៅជួយរុញ ក៏ស្រាប់តែប្រទះឃើញសាកសពនៅក្នុងរថយន្ដបង្កការភ្ញាក់ផ្អើលតែម្តង។ 

ហេតុការណ៍ខាងលើនេះ បានកើតឡើងនៅវេលាម៉ោង០៤ និង៣០នាទីរសៀល ថ្ងៃទី១១ ខែសីហា ឆ្នាំ២០២៥ ម្សិលមិញនេះ នៅចំណុចភូមិអូរខ្លាឃ្មុំ សង្កាត់អូរស្មាច់ ក្រុងសំរោង ខេត្តឧត្ដរមានជ័យ ។

ប្រភពដដែលបន្តថា៖ ករណីនេះ គឺសង្ស័យជាករណី (ឃាតកម្ម) សម្លាប់រួចដឹកយកទៅបោះចោលកន្លែងស្ងាត់ បំបាត់ភស្តុតាង។ ប៉ុន្តែសំណាងអាក្រក់រថយន្តត្រូវជាប់ផុង ទៅមុខមិនរួច ក៏ប្រជាពលរដ្ឋនាំគ្នាជួយរុញ និងប្រទះឃើញមនុស្សស្លាប់ រួចទូរស័ព្ទរាយការណ៍ប្រាប់សមត្ថកិច្ចចុះមកឃាត់ខ្លួនតែម្តង។

គួរបញ្ជាក់ថា៖ ករណីនេះក្នុងចំណោមបក្ខពួកជនជាតិចិន ដែលបានសម្លាប់មនុស្ស គឺមានគ្នាចំនួន០៦នាក់ និងរថយន្តជិះធ្វើកម្មភាពចំនួន០២គ្រឿង ។ ក្រោយពីបែកការណ៍ រថយន្ត០១គ្រឿង (មានគ្នា៥នាក់) បានបើករត់គេចខ្លួនបាត់ស្រមោល ។

បច្ចុប្បន្នសមត្ថកិច្ចជំនាញ កំពុងបន្តការស្រាវជ្រាវតាមប្រម៉ាញ់ចាប់ខ្លួន បក្ខពួកជនសង្ស័យដែលសេសសល់ ខណ:ដែលព្យាយាមរត់គេចខ្លួនទាំងនោះ យកមកដាក់ទោសតាមនីតិវិធីច្បាប់៕