សមត្ថកិច្ចបានឃាត់ខ្លួនជនបរទេស១០០នាក់ នៅក្នុងប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យា(Online Scams)

 

សមត្ថកិច្ចបានឃាត់ខ្លួនជនបរទេស១០០នាក់នាថ្ងៃទី១៦កក្កដានេះ នៅក្នុងប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យា(Online Scams)។ ប្រតិបត្ដិការនេះធ្វើឡើងនៅទីតាំងផ្សេងគ្នាក្នុងសង្កាត់បឹងកេងកងទី៣ ខណ្ឌបឹងកេងកង និងសង្កាត់ឃ្មួញខណ្ឌសែនសុខ រាជធានីភ្នំពេញ។ ជនបរទេសទាំង១០០នាក់មានដូចជា ជនជាតិចិនតៃវ៉ាន់៧៥នាក់, ⁠ជនជាតិចិន២៤នាក់ និងវៀតណាមម្នាក់។ ចំពោះសម្ភារៈមានទូរសព្ទ៤៦៩គ្រឿង, កំព្យុទ័រ១២២គ្រឿង,Laptop៥គ្រឿង, ⁠លិខិតឆ្លងដែន៣៤ក្បាល(ចិនតៃវ៉ាន់), រថយន្តសរុបចំនួន២គ្រឿង, ស៊ីមទូរសព្ទជាច្រើនមិនទាន់ប្រើប្រាស់។ 

បច្ចុប្បន្នជនជាតិចិនតៃវ៉ាន់ វៀតណាម និងចិនព្រមទាំងសម្ភារៈជាវត្ថុតាងទាំងអស់ ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញដើម្បីបន្តអនុវត្តនីតិវិធី ព្រមទាំងចាត់វិធានការតាមផ្លូវច្បាប់ឱ្យតឹងរ៉ឹងបំផុតចំពោះមេក្លោងទាំងឡាយដែលជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យានេះ។ សូមជម្រាបថា កម្លាំងចម្រុះនៃរដ្ឋបាលរាជធានីភ្នំពេញដែលចុះធ្វើប្រតិបត្ដិការដឹកនាំដោយលោកហ៊ុន សុរិទ្ធី អភិបាលរងរាជធានីភ្នំពេញដោយសហការជាមួយសមត្ថកិច្ចនិងអាជ្ញាធរពាក់ព័ន្ធ៕