គ្រូបង្រៀនម្នាក់នៅឃុំកំពង់ស្វាយ ដែលបង្គាប់ឲ្យសិស្សស្រីៗថតរូបអាក្រាតកាយជាថ្នូរបានពិន្ទុល្អ ត្រូវបានតុលាការសម្រេចឃុំខ្លួនដាក់ពន្ធនាគារហើយ !

ខេត្តកណ្ដាល ៖ លោក ស្វាយ តុញ ចៅក្រមសើបសួរសាលាដំបូងខេត្តកណ្តាល បានចេញដីកាឃុំខ្លួនគ្រូបង្រៀនម្នាក់នៅស្រុកកៀនស្វាយ ខេត្តកណ្តាល ដែលបង្គាប់ឲ្យសិស្សស្រីថតរូបអាក្រាតកាយ ជាថ្នូរបានពិន្ទុល្អ ដាក់ពន្ធនាគារជាបណ្តោះអាសន្នហើយ !។ 

គ្រូបង្រៀនរូបនេះត្រូវបាន លោកស្រី ផាន់ សុគន្ធថង តំណាងអយ្យការអមសាលដំបូងខេត្តកណ្តាល បានចោទប្រកាន់ពីបទ៖ « គំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ » និង « រុកកួនខាងផ្លូវភេទ »។ នេះបើតាម លោក ខា ដែនណា អ្នកនាំពាក្យអយ្យការអមសាលាដំបូងខេត្តកណ្ដាល និង លោក សូ សារិន អ្នកនាំពាក្យសាលាដំបូងខេត្តកណ្ដាល អោយដឹងនៅថ្ងៃទី១១ ខែសីហា ឆ្នាំ២០២៥នេះ។ 

អ្នកនាំពាក្យបានបញ្ជាក់ថា៖ បទល្មើសនេះយោងតាមក្រមព្រហ្មទណ្ឌ មាត្រា២៣២ ដែលបានចែងថា ៖ «បទគំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ ត្រូវផ្ដន្ទាទោសដាក់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ពី ១លានរៀល ទៅ ៤លានរៀល»។ 

សេចក្តីរាយការណ៍ពីសមត្ថកិច្ច បានឲ្យដឹងថា៖ ជនត្រូវចោទ ឈ្មោះ ហឿន រ៉ាវី អាយុ៣៨ឆ្នាំ មុខរបរគ្រូបង្រៀនថ្នាក់ទី៩ និងទី១០ ផ្នែកគណិតវិទ្យា មានទីលំនៅភូមិកំពង់ស្វាយ២ ឃុំកំពង់ស្វាយ ស្រុកកៀនស្វាយ ខេត្តកណ្តាល៕