អតីតសមាជិកសភាឥណ្ឌា ថាទង្វើរបស់ថៃបានបំផ្លាញរូបសំណាកអាទិទេពហិណ្ឌូ និងសំណង់សាសនាហិណ្ឌូ មិនអាចលើកលែងបានឡើយ

លោក Vijayasai Reddy V ជាអតីតសមាជិកសភាឥណ្ឌា កាលពីថ្ងៃទី២៣ ធ្នូ បានបង្ហោះក្នុងបណ្តាញសង្គម រិះគន់យោធាថៃ ចំពោះការបំផ្លាញរូបសំណាកហិណ្ឌូដ៏ធំមួយដែលសាងសង់ដោយកម្ពុជា ថាជាទង្វើដែលមិនអាចទទួលយកបាន និងមិនសមហេតុផល ដោយសកម្មភាពនេះ ត្រូវបានចាត់ទុកថា ជាការវាយប្រហារលើជំនឿ និងបេតិកភណ្ឌវប្បធម៌ ដែលបង្ហាញពីការមិនអត់ឱន និងមិនគោរពជាខ្លាំង។

លោកបានឲ្យដឹងថា៖ ការបំផ្លាញរូបសំណាកអាទិទេពហិណ្ឌូក្រោមលេសនៃជម្លោះព្រំដែន គឺមិនអាចទទួលយកបានទេ។ មិនថាកម្ពុជាបានដាក់ឬអត់នោះទេ ការវាយប្រហារជំនឿ និងបេតិកភណ្ឌគ្រាន់តែបង្ហាញពីការមិនអត់ឱនប៉ុណ្ណោះ។ ទាំងប្រទេសថៃ និងកម្ពុជា សុទ្ធតែជាប្រទេសកាន់ព្រះពុទ្ធសាសនា ប៉ុន្តែប្រវត្តិសាស្ត្របានកត់ត្រា អំពីការធ្វើទុក្ខបុកម្នេញរបស់ថៃម្តងហើយម្តងទៀតលើប្រាសាទហិណ្ឌូ និងការប៉ុនប៉ងលុបបំបាត់ភស្តុតាងទាំងនេះនៅកម្ពុជា។ អំពើហិង្សាប្រឆាំងនឹងនិមិត្តសញ្ញា និងការបំផ្លាញរូបសំណាកអាទិទេពហិណ្ឌូដ៏ពិសិដ្ឋមិនអាចត្រូវបានលាបពណ៌ដោយពាក្យស្លោកនោះទេ។ លោកបានបញ្ជាក់ថា៖ គ្មានសាសនាណាមួយបង្ហាញពី “សន្តិភាព” របស់ខ្លួនដោយការបំផ្លាញជំនឿរបស់អ្នកដទៃឡើយ។