អ្នកឆ្លើយឆ្លងព័ត៌មានប្រចាំសេតវិមាននៃក្រុមហ៊ុន Next News Network ថាខ្លួនមានកិត្តិយសដែលបានឈរជាមួយពលរដ្ឋខ្មែរដើម្បីយុត្តិធម៌

 

ផ្សាយថ្ងៃទី២០ ខែ០៨ ឆ្នាំ២០០៥

អ្នកឆ្លើយឆ្លងព័ត៌មានប្រចាំសេតវិមានរបស់ប្រធានាធិបតីអាមេរិកប្រចាំក្រុមហ៊ុន Next News Network អះអាងថា លោកពិតជាមានកិត្តិយសបំផុតក្នុងការឈរជាមួយពលរដ្ឋខ្មែរ ដើម្បីយុត្តិធម៌សម្រាប់កម្ពុជា។

លោក ហ្គារី ហ្វ្រែនឈី (Gary Franchi) បានសរសេរនៅលើទំព័រហ្វេសប៊ុករបស់ខ្លួននៅថ្ងៃទី១៩ សីហា នេះថា លោកមិនមានបំណងចង់បានកិត្តិយស ឬកេរ្តិ៍ឈ្មោះពីការរាយការណ៍អំពីព្រឹត្តិការណ៍ជម្លោះរវាងកម្ពុជា-ថៃ នោះទេ ប៉ុន្តែលោកចង់ធ្វើអ្វីដែលលោកដឹងថាវាត្រឹមត្រូវក្នុងបេះដូងរបស់លោកប៉ុណ្ណោះ ហើយនេះក៏ជាគោលការណ៍តែមួយគត់ដែលលោកមានដែរចំពោះអ្វីដែលលោកបានមើលឃើញថាត្រឹមត្រូវ ឬមិនត្រឹមត្រូវតែប៉ុណ្ណោះ។

លោក ហ្គារី ហ្វ្រែនឈី (Gary Franchi) លើកឡើងថា បើមិនមានលោក ម៉ៃឃើល ប៊ើរី អាល់ហ្វារ៉ូ (Michael B Alfaro) ដែលបាននាំយកស្ថានការណ៍កម្ពុជា មកឱ្យលោកបានដឹងទេ លោកក៏មិនអាចជួយផ្សព្វផ្សាយអំពីការរងទុក្ខ និងភាពអត់ធ្មត់របស់ប្រជាជនកម្ពុជា ក្នុងពេលវេលាដ៏សំខាន់បំផុតនោះបានដែរ។

លោកបន្ថែមថា មានមនុស្សជាច្រើនក្នុងអាជីពដូចជារូបលោកដែលគេជ្រើសរើសធ្វើជាមិនដឹងមិនឮក្នុងការស្វែងយល់អំពីការឈឺចាប់របស់អ្នកដទៃ ប៉ុន្តែក្នុងនាមលោកជាអ្នកសារព័ត៌មាន ត្រូវតែមានភាពក្លាហានដើម្បីផ្តល់ពន្លឺចូលទៅក្នុងភាពងងឹត សម្រាប់ជួយឱ្យភាពយុត្តិធម៌អាចមានឱកាសលេចចេញនៅថ្ងៃណាមួយ។

លោក ហ្គារី ហ្វ្រែនឈី បញ្ជាក់ថា លោកពិតជាមានក្តីសោមនស្សរីករាយយ៉ាងខ្លាំងដែលទទួលបានលិខិតសរសើរ និងការអរគុណពីសមាគមខ្មែរប្រចាំរដ្ឋ North Carolina។

លោកគូសបញ្ជាក់ថា លោកព្រមទទួលយកលិខិតសរសើរ និងការអរគុណនេះ គឺមិនមែនសម្រាប់លោកតែម្នាក់ឯងនោះទេ ប៉ុន្តែគឺដើម្បីជំនួសឱ្យជនរងគ្រោះដែលមានបំណងឱ្យជួយបង្ហាញអំពីរឿងរ៉ាវរបស់ពួកគេទៅកាន់ពិភពលោកក្នុងពេលនេះតែប៉ុណ្ណោះ។

ប្រធានសមាគមកម្ពុជាប្រចាំរដ្ឋ North Carolina លោក ថាច់ សីហា បានសរសេរលិខិតថ្លែងអំណរគុណមួយច្បាប់ទៅកាន់ប្រធានអ្នកឆ្លើយឆ្លងព័ត៌មានរបស់សេតវិមានប្រធានាធិបតីអាមេរិក លោក ហ្គារី ហ្វ្រែនឈី (Gary Franchi) នៅថ្ងៃទី១៩ ខែសីហា ឆ្នាំ២០២៥ នេះ។

ខ្លឹមសារក្នុងលិខិតនេះ រៀបរាប់ថា ក្នុងនាមជាតំណាងសហគមន៍កម្ពុជា សូមថ្លែងអំណរគុណពីចិត្តដ៏ស្មោះចំពោះការប្ដេជ្ញាចិត្តរបស់លោក ហ្គារី ហ្វ្រែនឈី ដែលបានផ្តល់ការពិត និងយុត្តិធម៌ ដោយបានលើកឡើងពីសំឡេងប្រជាជនកម្ពុជា ក្នុងវិបត្តិដ៏រន្ធត់ហិង្សា ដែលផ្ទុះតាមបណ្ដោយព្រំដែនកម្ពុជា-ថៃ កន្លងមកនោះ។

លិខិតដដែល បញ្ជាក់ថា ការខិតខំប្រឹងប្រែងរបស់លោក ហ្គារី ហ្វ្រែនឈី (Gary Franchi) បានផ្តល់សំឡេងដល់សហគមន៍កម្ពុជា ក្នុងការតវ៉ាដើម្បីយុត្តិធម៌ ជាពិសេសវត្តមានរបស់លោក ម៉ៃឃើល ប៊ើរី អាល់ហ្វារ៉ូ (Michael B Alfaro) ដែលបានជួយឱ្យពិភពលោកបានដឹងឮពីការចង់បានសន្តិភាពរបស់កម្ពុជា នាពេលនេះ។

ជុំវិញបញ្ហានេះ លោក ហ្គារី ហ្វ្រែនឈី (Gary Franchi) បានសរសេរនៅលើទំព័រហ្វេសប៊ុកកាលពីថ្ងៃទី១៦ សីហា ថា ទីប្រឹក្សាប្រធានាធិបតីអាមេរិក លោក ដូណាល់ ត្រាំ គឺលោក ម៉ៃឃើល ប៊ើរី អាល់ហ្វារ៉ូ (Michael B Alfaro) បានទៅដល់ប្រទេសកម្ពុជា និងបានរាយការណ៍ដោយផ្ទាល់ពីព្រំដែនកម្ពុជា-ថៃ។

នៅទីនោះ លោកបានឃើញកងកម្លាំងថៃ ដែលបានសង់របងខ្សែដែក បង្ខំឱ្យពលរដ្ឋខ្មែរចាកចេញពីផ្ទះសម្បែង ការដាក់អាវុធតម្រង់ទៅលើជនស៊ីវិល រួមទាំងកុមារ និងការបំផ្លិចបំផ្លាញសហគមន៍ ជាដើម របស់លោក ម៉ៃឃើល ប៊ើរី អាល់ហ្វារ៉ូ (Michael B Alfaro) ត្រូវបានបញ្ជូនទៅកាន់លោក ដូណាល់ ត្រាំ ដោយផ្ទាល់៕