រឿងសាកលវិទ្យាល័យថៃដកសញ្ញាបត្រ សម្ដេចហ៊ុន សែនតបថាខួរក្បាលសម្ដេចមិនកើតចេញពីសាលានោះទេ!

 

ឆ្លើយតបនឹងសាកលវិទ្យាល័យមួយរបស់ថៃដែលបានបោះឆ្នោតដកហូតសញ្ញាបត្រកិត្ដិយសថ្នាក់បណ្ឌិត សម្ដេចតេជោ ហ៊ុន សែន បានបញ្ជាក់នៅលើបណ្ដាញសង្គមថា គឺជារឿងគួរអស់សំណើចណាស់ ព្រោះសម្ដេចបានបោះសញ្ញាបត្រនោះចោលក្នុងបង្គន់តាំងពីឆ្នាំ២០០៨មកម៉្លេះ ហើយខួរក្បាលសម្ដេចក៏មិនកើតចេញពីសាលានោះដែរ។

សម្ដេចបញ្ជាក់ថា៖“គួរអស់សំណើចណាស់ ថ្ងៃនេះខ្ញុំលឺថាសាកលវិទ្យាល័យថៃមួយនោះដែលខ្ញុំមិនចាំឈ្មោះផង បានបោះឆ្នោតដកហូតសញ្ញាបត្រពីខ្ញុំ!ខ្ញុំសូមបញ្ជាក់ប្រាប់អ្នកវិញថា អ្នកមិនបាច់ដកចេញសញ្ញាបត្រពីខ្ញុំនោះទេ ព្រោះខ្ញុំបានបោះវាចោលចូលក្នុងបង្គន់តាំងពីឆ្នាំ២០០៨ នៅពេលដែលថៃលើកកងទ័ពចូលឈ្លានពានប្រាសាទព្រះវិហាររបស់ខ្មែរមកម៉្លេះ!សញ្ញាបត្ររបស់អ្នកគ្មានតម្លៃណាមួយសម្រាប់ខ្ញុំរក្សាទុកនោះទេ។ខ្ញុំមិនមានមោទនភាពណាមួយចំពោះក្រដាសសញ្ញាបត្រមួយសន្លឹករបស់អ្នកនោះឡើយ។ខួរក្បាលរបស់ ហ៊ុន សែន មិនមែនកើតចេញពីសាលារបស់អ្នកឯងនោះទេ ខួរក្បាលរបស់ ហ៊ុន សែន គឺកើតចេញពីការបង្រៀនរបស់ប្រជាជនខែ្មរនិងសាលារៀនរបស់កម្ពុជា៕”