មន្ត្រីសិង្ហបុរី ប្រកាសលាលែងពីតំណែង ក្រោយទទួលស្គាល់ថា ខ្លួនលួចទាក់ទងជាមួយស្ត្រីម្នាក់

 

សិង្ហបុរី៖ លោក Muhammad Faishal Ibrahim រដ្ឋមន្ត្រីស្តីទីទទួលបន្ទុកកិច្ចការមូស្លីមសិង្ហបុរី បានសម្រេចលាលែងពីតំណែងនយោបាយ បន្ទាប់ពីទទួលស្គាល់ថា ខ្លួនបានទាក់ទងជាមួយស្ត្រីម្នាក់ដែល មិនបានឆ្លើយតបទៅនឹងស្តង់ដារដែលរំពឹងទុកពីអ្នកកាន់តំណែងសាធារណៈ និងសមាជិកសភា។

នាយករដ្ឋមន្ត្រីសិង្ហបុរី លោក Lawrence Wong បានប្រកាសកាលពីថ្ងៃទី២០ ខែកក្កដា ឆ្នាំ២០២៦ថា លោក Faishal Ibrahim បានលាលែងពីតួនាទីជារដ្ឋមន្ត្រីស្តីទីទទួលបន្ទុកកិច្ចការមូស្លីម សមាជិកសភា និងសមាជិកគណបក្សសកម្មភាពប្រជាជន (PAP) ដោយមានប្រសិទ្ធភាពភ្លាមៗ។

លោក Wong បានបញ្ជាក់ថា ករណីនេះត្រូវបានការិយាល័យនាយករដ្ឋមន្ត្រីទទួលដំណឹងប្រមាណមួយខែមុន តាមរយៈអ៊ីមែលពីស្ត្រីម្នាក់ ដែលបានលើកឡើងពីការទាក់ទងរបស់នាងជាមួយលោក Faishal Ibrahim។

បន្ទាប់ពីទទួលបានព័ត៌មាននេះ លោកនាយករដ្ឋមន្ត្រីបានបញ្ជាឱ្យមានការពិនិត្យភ្លាមៗ ដោយភាគីទាំងពីរត្រូវបានសាកសួរដាច់ដោយឡែក ដើម្បីស្វែងយល់ពីទស្សនៈ និងព័ត៌មានរបស់ម្នាក់ៗ។

តាមការបញ្ជាក់របស់លោក Lawrence Wong ការទាក់ទងភាគច្រើនរវាងលោក Faishal Ibrahim និងស្ត្រីរូបនោះ បានធ្វើឡើងតាមរយៈសារអនឡាញ ហើយពួកគេក៏ធ្លាប់ជួបគ្នានៅក្នុងកម្មវិធីសាធារណៈមួយចំនួនផងដែរ។

ភាគីទាំងពីរបានដាក់ការចោទប្រកាន់អំពីការយាយីទៅវិញទៅមក ហើយករណីនេះត្រូវបានបញ្ជូនទៅប៉ូលិសសិង្ហបុរី ដើម្បីស៊ើបអង្កេត។

ប៉ុន្តែបន្ទាប់ពីពិនិត្យលើព័ត៌មានពាក់ព័ន្ធ និងពិគ្រោះជាមួយការិយាល័យអគ្គមេធាវីសិង្ហបុរី អាជ្ញាធរបានវាយតម្លៃថា មិនមានបទល្មើសព្រហ្មទណ្ឌត្រូវបានប្រព្រឹត្តដោយភាគីណាមួយឡើយ ហើយនឹងមិនមានការចាត់វិធានការផ្លូវច្បាប់ព្រហ្មទណ្ឌប្រឆាំងនឹងភាគីទាំងពីរទេ។

ទោះជាយ៉ាងណា លោក Lawrence Wong បានលើកឡើងថា បញ្ហាសំខាន់មួយទៀត គឺការវាយតម្លៃថា តើអាកប្បកិរិយារបស់លោក Faishal Ibrahim ស្របតាមស្តង់ដារដែលរំពឹងទុកពីអ្នកកាន់តំណែងនយោបាយ និងសមាជិកសភាឬយ៉ាងណា។

លោក Faishal Ibrahim បានទទួលស្គាល់ថា ការប្រព្រឹត្តរបស់លោកមិនបានឆ្លើយតបទៅនឹងស្តង់ដារទាំងនោះ ហើយបានសម្រេចចិត្តលាលែងពីតំណែង ដើម្បីទទួលខុសត្រូវ និងផ្តោតលើគ្រួសារ។

ក្នុងលិខិតជូននាយករដ្ឋមន្ត្រី លោក Faishal Ibrahim បានបញ្ជាក់ថា មិនមានទំនាក់ទំនងផ្លូវកាយរវាងលោក និងស្ត្រីរូបនោះទេ ប៉ុន្តែលោកទទួលស្គាល់ថា លោកមានកំហុសក្នុងការវិនិច្ឆ័យលើការគ្រប់គ្រងការទាក់ទង និងមិនបានកំណត់ព្រំដែនឱ្យបានច្បាស់លាស់តាំងពីដំបូង។

លោកបាននិយាយថា ការសម្រេចចិត្តចាកចេញពីនយោបាយ គឺដើម្បីផ្តល់ពេលវេលា និងការយកចិត្តទុកដាក់ដល់គ្រួសារ។

លោក Lawrence Wong បានទទួលយកការលាលែងនេះ និងបានថ្លែងអំណរគុណចំពោះការរួមចំណែករបស់លោក Faishal Ibrahim ក្នុងរយៈពេលជិត ២០ឆ្នាំ នៃការបម្រើសាធារណៈ។

លោកបានលើកឡើងថា លោក Faishal Ibrahim បានចូលរួមចំណែកក្នុងការពង្រឹងភាពធន់របស់សហគមន៍ គាំទ្រការស្តារនីតិសម្បទា និងការធ្វើសមាហរណកម្មអ្នកធ្លាប់ប្រព្រឹត្តបទល្មើស ព្រមទាំងជួយលើកកម្ពស់ជីវភាពគ្រួសារងាយរងគ្រោះ។

ជំនួសតំណែងនេះ លោក Zaqy Mohamad រដ្ឋមន្ត្រីជាន់ខ្ពស់រងក្រសួងការពារជាតិ និងក្រសួងនិរន្តរភាព និងបរិស្ថាន នឹងត្រូវតែងតាំងជារដ្ឋមន្ត្រីស្តីទីទទួលបន្ទុកកិច្ចការមូស្លីម។

លោក Muhammad Faishal Ibrahim បានចូលប្រឡូកក្នុងនយោបាយនៅឆ្នាំ២០០៦ និងធ្លាប់កាន់តំណែងជាច្រើនក្នុងរដ្ឋាភិបាលសិង្ហបុរី មុនពេលប្រកាសចាកចេញពីឆាកនយោបាយ៕

ប្រភព៖ Channel NewsAsia (CNA)