បង្ក្រាបបទល្មើស Scam Online ឃាត់ខ្លួនជនបរទេសជាង៣០០នាក់

(ភ្នំពេញ)៖ កម្លាំងសមត្ថកិច្ចនៃស្នងការនគរបាលរាជធានីភ្នំពេញ នៅល្ងាចថ្ងៃទី១២ ខែមេសា ឆ្នាំ២០២៦នេះ បានបន្តប្រតិបត្តិការបង្ក្រាបបទល្មើស Scam Online នៅអគារមួយកន្លែងទល់មុខស្ថានទូតបារាំង ខណ្ឌដូនពេញ ដោយឃាត់ខ្លួនជនបរទេសជាង៣០០នាក់។

ប្រតិបត្តិការនេះ ធ្វើឡើងក្រោមការបញ្ជាផ្ទាល់ពីឯកឧត្តម ឃួង ស្រេង អភិបាលរាជធានីភ្នំពេញ និងលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ក្រោមការសម្របសម្រួលរបស់តំណាងអយ្យការអមសាលាដំបូងរាជធានីភ្នំពេញ។

ក្នុងកិច្ចប្រតិបត្តិការខាងលើ សមត្ថកិច្ចរកឃើញ មនុស្សសរុប៣១១នាក់ មាន៥សញ្ជាតិ ដូចជា ចិន២៥៤នាក់ (ស្រី១៨) ក្នុងនោះ តៃវ៉ាន់ ១៨២នាក់ (ស្រី១៤), ម៉ាឡេស៊ី៣០នាក់ (ស្រី៣នាក់), វៀតណាម២៣នាក់ (ស្រី៩នាក់) និងឥណ្ឌា២នាក់ (ស្រី១នាក់)។ សម្ភារបច្ចេកទេស ទូរស័ព្ទដៃ៦១៥គ្រឿង, Laptop ១៤០គ្រឿង, All in One ៣១គ្រឿង, Monitor ៦គ្រឿង និងCPU ៣គ្រឿង។