ករណីឆ្លងចរន្តអគ្គិសនី បណ្ដាលឱ្យមានអគ្គិភ័យឆាបឆេះផ្ទះ ប្រជាពលរដ្ឋ០១ខ្នង នៅក្រុងបាត់ដំបង

 

បាត់ដំបង៖ នៅថ្ងៃទី០៤ ខែកក្កដា ឆ្នាំ២០២៥ វេលាម៉ោង១៤:៥០នាទី នៅត្រង់ចំណុចបូរីមហាទេព ក្នុងក្រុមទី ១២ ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង មានករណីគ្រោះថ្នាក់អគ្គិភ័យមួយកើតឡើង បណ្តាលឲ្យឆេះផ្ទះថ្ម របស់ប្រជាពលរដ្ឋចំនួន២ល្វេងទំហំ ០៨ម៉ែត្រ x ២០ម៉ែត្រ សង់អំពីបេតុង (ឆេះជាន់ទី១ ដល់ជាន់ទី៣) របស់ម្ចាស់ឈ្មោះ វេង ពិសី ភេទប្រុស អាយុ៥៨ឆ្នាំ មានទីលំនៅកន្លែងកើតហេតុខាងលើ ។ សម្ភារខូចខាតរួមមាន ឆេះផ្ទះចំនួន ០១ខ្នង ២ល្វេង និងឆេះសម្ភារៈនៅក្នុងផ្ទះ ។

សមត្ថកិច្ចជំនាញ បានឲ្យដឹងថា៖ ក្នុងករណីអគ្គិភ័យនេះ បណ្ដាលមកពីឆ្លងចរន្តអគ្គិសនី ធ្វើអោយផ្ទុះសេខ្សែភ្លើងទើបបណ្តាលអោយមានអគ្គិភ័យតែម្តង ។ គ្រោះអគ្គិភ័យនេះ មិនបានបង្កគ្រោះថ្នាក់ដល់អាយុជីវិតមនុស្សឡើយ ។ 

ករណីនេះដែរ កម្លាំងនគរបាលការិយាល័យនគរបាល បង្ការពន្លត់អគ្គិភ័យ និងសង្រ្គោះ នៃស្នងការដ្ឋាននគរបាលខេត្តបាត់ដំបង រួមជាមួយកម្លាំងនគរបាលបង្ការពន្លត់អគ្គិភ័យតាមស្រុក សហការជាមួយកម្លាំងចម្រុះ បានចុះពន្លត់អគ្គិភ័យ នេះដោយប្រើប្រាស់រថយន្តពន្លត់អគ្គិភ័យចំនួន ០៨គ្រឿង ប្រើប្រាស់ទឹកអស់ចំនួន ៤៥ឡាន ទើបគ្រប់គ្រងស្ថានការណ៍ អគ្គិភ័យនេះបានទាំងស្រុង៕