ប្រមុខ NATO៖ ចាំបាច់ត្រូវបង្កើនការការពារដែនអាកាស និងមីស៊ីលរហូតដល់៤០០%

 

អគ្គលេខាធិការសម្ព័ន្ធយោធាណាតូ លោក Mark Rutte បាននិយាយកាលពីថ្ងៃចន្ទ ខណៈស្ថិតនៅក្នុងទីក្រុងឡុងដ្រ៍ ចក្រភពអង់គ្លេសថា សម្ព័ន្ធយោធានេះចាំបាច់ត្រូវបង្កើនដល់៤០០% លើការការពារដែនអាកាស និងមីស៊ីល ជាអាទិភាពមួយក្នុងចំណោមអាទិភាពជាច្រើន សម្រាប់កិច្ចប្រជុំកំពូលនៃសមាជិកទាំងអស់ នៅទីក្រុងឡាអេ នៅចុងខែនេះ។

លោក Rutte កំពុងជំរុញឱ្យសមាជិកបង្កើនការចំណាយលើវិស័យការពារជាតិដល់ទៅ ៣,៥% នៃផលិតផលក្នុងស្រុកសរុប(GDP) និងប្តេជ្ញាបន្ថែម ១,៥% ចំពោះការចំណាយទាក់ទងនឹងសន្តិសុខឲ្យកាន់តែទូលំទូលាយ ដើម្បីបំពេញតាមការទាមទាររបស់លោកប្រធានាធិបតីសហរដ្ឋអាមេរិក Donald Trump សម្រាប់គោលដៅ ៥% ។ កាលពីខែមុន លោកបាននិយាយថា លោកសន្មតថា គោលដៅនោះនឹងត្រូវបានឯកភាពគ្នានៅក្នុងកិច្ចប្រជុំកំពូលនៅថ្ងៃទី ២៤-២៥ ខែមិថុនា ខាងមុខ។

លោក Rutte បាននិយាយនៅក្នុងសុន្ទរកថា ថា សម្រាប់សម្ព័ន្ធយោធាណាតូនឹងនៅតែរារាំង និងការការពារដ៏ជឿជាក់ ដែលខ្លួនចាំបាច់ត្រូវការ «ការបង្កើន៤០០% នៃការការពារដែនអាកាស និងមីស៊ីល»។ «យើងបានមើលឃើញនៅក្នុងប្រទេសអ៊ុយក្រែនពីរបៀបដែលរុស្ស៊ីអនុវត្តភេរវកម្ម ដូច្នេះយើងនឹងពង្រឹងខែល ដែលការពារដែនអាកាសរបស់យើង»។

ប្រទេសជាច្រើននិយាយថា ពួកគេកំពុងធ្វើដូច្នេះ ដោយចក្រភពអង់គ្លេសសន្យាថានឹងបង្កើនពី ២,៣% ទៅ ២,៥% នៃផលិតផលក្នុងស្រុកសរុប(GDP) នៅឆ្នាំ២០២៧ និង ៣% នៃGDP នៅពេលក្រោយទៀត។ ប្រទេសអាល្លឺម៉ង់ បាននិយាយថា ខ្លួននឹងត្រូវការទាហានសកម្មបន្ថែមប្រហែល ៥០.០០០ ទៅ ៦០.០០០នាក់ ក្រោមគោលដៅថ្មីរបស់ណាតូ។