ឯកឧត្តមហ៊ុនម៉ានី÷សូមអរគុណចំពោះទឹកចិត្តកូនខ្មែរសម្រាប់ប្រទេសជាតិ

ខ្ញុំពិតជាមានមោទនភាពដែលបានកើតមកជាកូនខ្មែរ  ព្រឹត្តិការណ៍ដំណើរថ្មើរជើងម្សិលមិញនេះបានបង្ហាញយ៉ាងច្បាស់ពីជម្រៅនៃឆន្ទៈ ទឹកចិត្ត ក្តីស្រឡាញ់ដែលកូនខ្មែរមានសម្រាប់ប្រទេសជាតិយើង។ ១៥ ម៉ឺននាក់ចូលរួម ក្នុងពេលដែលយើងបានរៀបចំ ផ្សព្វផ្សាយ រយៈពេលត្រឹមតែ២-៣ថ្ងៃតែប៉ុណ្ណោះ ប៉ុន្តែព្រះសង្ឃ ពុកម៉ែបងប្អូនក្នុងរាជធានី និងមកពីបណ្តាខេត្តនានា ពីគ្រប់មជ្ឈដ្ឋាន និងគ្រប់វ័យ បានបង្ហាញពីជម្រៅនៃទឹកចិត្ត ការគិតគូរ ការព្រួយបារម្ភ ដែលក្តីបារម្ភនេះ សរបញ្ជាក់ពីក្តីស្រឡាញ់ដែលកូនខ្មែរម្នាក់ៗមានសម្រាប់ជាតិយើង។ យើងបានមូលមតិ និងមានបំណងប្រាថ្នាតែមួយ គឺចង់ឃើញប្រជាជាតិយើងមានភាពសុខសាន្ត តរៀងទៅ ដូច្នេះចំពោះករណីតានតឹងនៅព្រំដែនរវាង កម្ពុជា-ថៃ យើងត្រូវចូលរួមតាមដានស្ថានការណ៍ ហើយត្រូវចូលរួមគាំទ្រ រាជរដ្ឋាភិបាលកម្ពុជា សម្តេចនាយករដ្ឋមន្រ្តី និងកងកម្លាំងយើងនៅជួរមុខ ដែលខំប្រឹងប្រែងទាំងយប់ ទាំងថ្ងៃ រកដំណោះស្រាយដោយសន្តិវិធីលើរាល់បញ្ហា និងត្រៀមខ្លួនជាស្រេចដើម្បីការពារបូរណភាពដែនដី បើមានភាពចាំបាច់។