ឯកឧត្ដម ទេសរដ្ឋមន្ដ្រី គន់ គីម ៖ សុខសន្ដិភាព គឺជាមូលដ្ឋានគ្រឹះ ដ៏សំខាន់របស់សង្គមជាតិ ក្នុងការអភិវឌ្ឍ និងការផ្ដល់បណ្ណកម្មសិទ្ធិដីធ្លីជូនប្រជាពលរដ្ឋ

ភ្នំពេញ ៖ ឯកឧត្ដម កិត្តិសង្គហបណ្ឌិត គន់ គីម ទេសរដ្ឋមន្រ្ដី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្ដរាយណ៍ និងជាប្រធានក្រុមការងារ រាជរដ្ឋាភិបាល ចុះមូលដ្ឋាន ខេត្តឧត្ដរមានជ័យ រួមជាមួយឯកឧត្ដម សាយ សំអាល់ ឧបនាយករដ្ឋមន្រ្ដី រដ្ឋមន្រ្ដី ក្រសួងរៀបចំដែនដី នគរូបនីយកម្ម និងសំណង់ បានអញ្ជើញជាអធិបតីភាព ក្នុងពិធីប្រកាស ខេត្តឧត្ដរមានជ័យ បញ្ចប់ការវាស់វែងដីធ្លី មានលក្ខណៈជាប្រព័ន្ធ និងប្រគល់វិញ្ញាបនប័ត្រ សម្គាល់ម្ចាស់អចលនវត្ថុ ជូនប្រជាពលរដ្ឋ ក្នុងភូមិសាស្រ្ដ ខេត្តឧត្ដរមានជ័យ។

ពិធីប្រកាស ខេត្តឧត្ដរមានជ័យ បញ្ចប់ការវាស់វែងដីធ្លី មានលក្ខណៈជាប្រព័ន្ធ និងប្រគល់វិញ្ញាបនប័ត្រ សម្គាល់ម្ចាស់អចលនវត្ថុ ជូនប្រជាពលរដ្ឋ ក្នុងភូមិសាស្រ្ដ ខេត្តឧត្ដរមានជ័យ រៀបចំឡើងនៅព្រឹកថ្ងៃទី១៩ ខែឧសភា ឆ្នាំ២០២៥។ ជាកិច្ចចាប់ផ្ដើមក្នុងពិធីនេះ ឯកឧត្ដម ទេសរដ្ឋមន្រ្ដី គន់ គីម បានថ្លែងការកោតសរសើរ និងវាយតម្លៃខ្ពស់ចំពោះការដឹកនាំតម្រង់ទិស របស់ឯកឧត្ដម សាយ សំអាល់ ឧបនាយករដ្ឋមន្រ្ដី រដ្ឋមន្រ្ដីក្រសួងរៀបចំដែនដី នគរូបនីយកម្ម និងសំណង់ ដែលបានជំរុញការចុះបញ្ជីដីធ្លី ទូទាំងប្រទេស ជូនប្រជាពលរដ្ឋបានឆាប់រហ័ស និងឈានដល់ការប្រកាស ការបញ្ចប់ការវាស់វែងដីធ្លីមានលក្ខណៈជាប្រព័ន្ធ នៅក្នុងខេត្តឧត្ដរមានជ័យនាពេលនេះ។ បន្ថែមពីនេះឯកឧត្តម ក៏បានថ្លែងអំណរគុណចំពោះថ្នាក់ដឹកនាំ មន្រ្ដី និងក្រុមការងារ គ្រប់ផ្នែកទាំងអស់របស់ខេត្ត ដែលបានសហការអនុវត្តការងារដោយយកចិត្តទុកដាក់ខ្ពស់ រហូតការងារទទួលបានជោគជ័យនៅពេលនេះ។ 

ឯកឧត្ដម ទេសរដ្ឋមន្រ្ដី គន់ គីម មានប្រសាសន៍បន្តថា ចំពោះគោលនយោបាយដីធ្លីនេះ រាជរដ្ឋាភិបាលដឹកនាំដោយគណបក្សប្រជាជនកម្ពុជា បានយកចិត្តទុកដាក់ខ្ពស់បំផុត ក្នុងការផ្ដល់កម្មសិទ្ធិជូនប្រជាពលរដ្ឋ។ ជាក់ស្ដែងក្រោយពីអនុវត្តជោគជ័យ នូវនយោបាយឈ្នះ ឈ្នះ កាលពីថ្ងៃទី២៩ ខែធ្នូ ឆ្នាំ១៩៩៨ សម្ដេចអគ្គមហាសេនាបតីតេជោ ហ៊ុន សែន បានចាប់ផ្ដើមដាក់ចេញនូវគោលនយោបាយ បែងចែកដីធ្លី ផ្ដល់កម្មសិទ្ធិឯកជន ជូនប្រជាពលរដ្ឋ ដែលអនុញ្ញាតឲ្យប្រជាពលរដ្ឋ មានសិទ្ធិកាន់កាប់ប្រើប្រាស់ និងអាស្រ័យផលលើដីជាក់ស្ដែងរបស់ខ្លួន។ ហើយនៅក្នុងឆ្នាំ២០១២ រាជរដ្ឋាភិបាលបានដាក់ចេញបទបញ្ជា លេខ ០១ បប គឺ “នយោបាយចាស់ សកម្មភាពថ្មីលើវិស័យដីធ្លី” ដែលជាយុទ្ធនាការ វាស់វែងចុះបញ្ជីដីធ្លី ដើម្បីដោះស្រាយស្ថានភាពដីធ្លីមិនច្បាស់លាស់ ឬមិនស្របច្បាប់ ឲ្យមកជាការកាន់កាប់ដោយច្បាស់លាស់ និងដោយសុវត្ថិភាព។ ហើយនៅក្នុងខេត្តឧត្ដរមានជ័យទាំងមូល ក្នុងយុទ្ធនាការ នៃបទបញ្ជាលេខ ០១ បប នេះ ចាប់ពី ខែកក្កដា ឆ្នាំ២០១២ ដល់ខែមិថុនា ឆ្នាំ២០១៣ បានចុះបញ្ជីដីធ្លី និងចេញបណ្ណកម្មសិទ្ធិជូនប្រជាពលរដ្ឋចំនួន ២៤៥៨៦ បណ្ណ ស្មើនិង ១ ៨៨៥៣គ្រួសារ លើផ្ទៃដីទំហំ ៨១ ៥៧០,២២ ហិចតា ក្នុង ៥៦ភូមិ ១៣ឃុំ សង្កាត់ ក្រុង១ និងស្រុក ចំនួន ៣។ 

ឯកឧត្ដម ទេសរដ្ឋមន្រ្ដី គន់ គីម បន្តទៀតថា រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី បានដាក់ចេញនូវយុទ្ធសាស្រ្ដបញ្ចកោណដំណាលទី១ ដែលក្នុងនោះបានផ្ដោតទៅលើ ការកែទម្រង់ដីធ្លីឲ្យកាន់តែសកម្ម និងស៊ីជម្រៅ តាមរយៈការជំរុញបញ្ចប់ នូវការចុះបញ្ជីដីធ្លីនៅទូទាំងប្រទេស និងការដោះស្រាយវិវាទដីធ្លី នៅក្រៅប្រព័ន្ធតុលាការ ឲ្យកាន់តែមានទំហំតូច និងឈានទៅលុបបំបាត់ទំនាស់ ដែលរ៉ាំរ៉ៃទាំងស្រុង។ ហើយនៅក្នុងយុទ្ធនាការវាស់វែង ចុះបញ្ជីដីធ្លីមានលក្ខណៈជាប្រព័ន្ធ ដែលក្រសួងរៀបចំដែនដី នគរូបនីយកម្ម និងសំណង់ បានដាក់ចេញនាចុងឆ្នាំ២០២៣ រហូតមកដល់ពេលនេះ គឺការចុះបញ្ជីដីធ្លី បង្ហើយ ជាការរួមចំណែកដ៏សំខាន់មួយ ដើម្បីសម្រេចឲ្យបាននូវ “បរិយាកាសគ្មានវិវាទនៅកម្ពុជា”។ 

ឯកឧត្ដម ទេសរដ្ឋមន្រ្ដី គន់ គីម បានសង្កត់ធ្ងន់ថា ប្រជាពលរដ្ឋនៅទូទាំងប្រទេស ដែលកំពុងទទួលបានផល ពីសុខសន្ដិភាព សុទ្ធតែដឹងច្បាស់ពី តម្លៃសុខសន្ដិភាព ដែលកម្ពុជារកបានមកដោយលំបាក ក្រោមការលះបង់ តស៊ូ របស់អតីតយុទ្ធជន យុទ្ធនារី និងថ្នាក់ដឹកនាំ នៃគណបក្សប្រជាជនកម្ពុជា ពិសេសគឺសម្ដេចអគ្គមហាសេនាបតីតេជោ ហ៊ុន សែន បិតាសន្ដិភាពរបស់កម្ពុជា។ ហើយការដែលប្រជាពលរដ្ឋ បានទទួលបណ្ណកម្មសិទ្ធិដីធ្លី ជាបន្តបន្ទាប់មកនេះ គឺជាផលមួយ នៃសន្ដិភាព។ សន្ដិភាព គឺជាមូលដ្ឋានគ្រឹះដ៏សំខាន់ នៃសង្គមជាតិរបស់យើង។ ប្រទេសជាតិមានសុខសន្ដិភាព ទើបមានការអភិវឌ្ឍធ្វើឲ្យសង្គម សេដ្ឋកិច្ចរបស់យើង បានរីកចម្រើនទៅមុខ និងប្រជាពលរដ្ឋមានជីវភាពរស់នៅកាន់តែល្អប្រសើរ។ ហើយនៅក្រោមម្លប់ សុខសន្ដិភាពនេះ គឺបានធ្វើឲ្យប្រទេសជាតិ និងប្រជាជនកម្ពុជា រួមទាំងអ្នកឧត្ដរមានជ័យផង មានការរីកចម្រើនជាបន្តបន្ទាប់ បង្កើតឱកាសការងារជាច្រើន បង្កលក្ខណៈសប្បាយរីករាយ និងក្ដីសង្ឃឹមជូនប្រជាពលរដ្ឋ៕